Fri, Feb 26, 2021

تین ملکوں کا سفر— کچھ سبق آموز پہلو
مولانا خالد سیف اللہ رحمانی
17.01.2020


افرادی قوت کے اعتبار سے بر صغیر کے ممالک (بھارت، پاکستان اور بنگلہ دیش)شاید دنیا کے سب سے مالدار خطے ہیں؛ اسی لئے یہاں کے محنت کار، ہنر مند اور اسکالر پوری دنیا میں افرادی وسائل کی ضرورت پوری کرنے میں اہم کردار ادا کرتے ہیں، اور ان کی صلاحیت اور جذبۂ محنت کو دیکھتے ہوئے ہر جگہ انہیں قدر کی نظر سے دیکھا جاتا ہے، یہاں سے لوگ جن ملکوں میں گئے ،وہاں انھوں نے اپنی خدمت اور صلاحیت کے گہرے نقوش چھوڑے اور اُس ملک کی تعمیر وترقی میں نمایاں حصہ ادا کیا، ان میں ایک اہم ملک جنوبی افریقہ ہے، خاص کر جوہانسبرگ اور ڈربن کے علاقے، جبکہ ملک کے تیسرے اہم شہر کیپ ٹاؤن میں مسلمانوں کی بڑی آبادی ملے نسل کے لوگوں کی ہے، جن کے آباء واجداد کو انگریز بیگار کرانے کے لئے لائے تھے، بر صغیر کے لوگوں میں ہندو بھی ہیں اور مسلمان بھی، یہ وہ ملک ہے جہاں کے محب وطن ہندوستانیوں نے مہاتما گاندھی کی مدد کی تھی، اور ایک گجراتی مسلمان تاجر نے ان کا تعاون کیا تھا، اب جو مسلمان وہاں آباد ہیں، ان کی آبادی کا تناسب دو تین فی صد ہے؛لیکن معاشی اعتبار سے ملک میں ان کو نمایاں مقام حاصل ہے، خاص کر تجارت کے میدان میں انھوں نے بڑی ترقی کی ہے۔
یہ زیادہ تر گجراتی مسلمان ہیں، جو کئی پشت پہلے ہندوستان سے گئے تھے، انھوں نے مشکل اوقات میں مقامی سیاہ فام آبادی کے ساتھ ہمدردانہ برتاؤ کیا؛ اس لئے غیر مسلم بھائیوں کے اندر عمومی طور پر ان کے بارے میں اچھے جذبات پائے جاتے ہیں، ماشاء اللہ ہندوستان اور بالخصوص گجرات سے جو لوگ وہاں گئے، انھوں نے اپنی بہتر شناخت قائم کی، اب وہاں ان کی عالیشان مسجدیں اور بڑی بڑی دینی درسگاہیں ہیں، اسلامی اسکول ہیں اور وہ وہاں کی سماجی سرگرمیوں میں پورے جوش وخروش کے ساتھ شامل ہیں، وہاںمسلمانوں کی نمائندہ تنظیم جمعیۃ علماء ساؤتھ افریقہ ہے، اس کی حیثیت وہاں قریب قریب وہی ہے، جو ہمارے ملک میں آل انڈیا مسلم پرسنل لا بورڈ کی ہے، حکومت بھی حسب ضرورت مسلمانوں کے مسائل کے سلسلہ میں ان سے مشورہ کرتی ہے۔
راقم جمعیۃ علماء کی دعوت پر پہلے بھی وہاں کاایک سے زیادہ سفر کر چکا ہے، اب پھر کئی ماہ پہلے جمعیۃ علماء کے صدر عالی قدر حضرت مولانا عباس علی جینا اور جنرل سکریٹری مولانا ابراہیم بھام نے دعوت دی کہ میں دسمبر میں، جو وہاں گرما کا موسم ہوتا ہے؛ لیکن درجۂ حرارت زیادہ نہیں ہوتا، حاضر ہوں، اور جمعیۃ کے تحت چلنے والے دارالعلوم میں بخاری شریف کی آخری حدیث کا درس دوں، اس سے پہلے بھی متعدد اہم شخصیتوں کو اس پروگرام کے لئے مدعو کیا گیا، جن میں مشہور فقیہ حضرت مولانا محمد تقی عثمانی صاحب دامت برکاتہم کا نام خاص طور پر قابل ذکر ہے، یہ دو روزہ پروگرام تھا، میں ۴؍ دسمبر کو پہنچا، پانچ دسمبر کو صبح میں علماء کی خصوصی مجلس تھی؛ اگرچہ یہ زمانہ وہاں گرمی کی چھٹی کا تھا؛ اس لئے مدارس کے بہت سے اساتذہ سفر پر تھے؛ لیکن پھر بھی شہر اور مضافات کے علماء کی ایک مناسب تعداد اور جمعیۃ کے ذمہ داران وکارکنان موجود تھے، راقم الحروف کے علاوہ اس دو روزہ پروگرام میں دارالعلوم دیوبند سے استاذ حدیث مولانا محمد سلمان بجنوری اور جامعہ مظاہر علوم سہارنپور سے مفتی محمد طاہر غازی آبادی بھی مدعو تھے، مولانا بجنوری تو پہلے دن تشریف نہیں لا سکے؛ لیکن ہم دونوں کا خطاب ہوا، پہلے اس حقیر نے وہاں کے حالات کی مناسبت سے مسلمانوں اور غیر مسلموں کے باہمی تعلقات پر پاور پوائنٹ کے ذریعہ تفصیلی خطبہ دیا، اور حاضرین کے سوالات کے جواب دیے، میں نے عرض کیا کہ آپ ہندوستان کے حالات سے سبق لیجئے، یہاں آزادی کی لڑائی ہندوؤں اور مسلمانوں نے مل کر لڑی ہے اور ہمارے بزرگوں نے ابنائے وطن سے خوشگوار تعلقات پر بہت توجہ دی تھی، اور اسی کا نتیجہ ہے کہ ایک حلقہ کے مطالبہ کے باوجود بھارت کو ہندو راشٹر ڈکلئیر نہیں کیا گیا؛ بلکہ ایک سیکولر ملک کی حیثیت سے اس کا دستور مرتب ہوا، مگر آزادی کے بعد مسلمانوں نے برادران وطن سے بہتر تعلق قائم رکھنے پر توجہ نہیں دی اور اس کے نتیجہ میں آج اس ملک سے نفرت کا آتش فشاں ابل رہا ہے، اور لوگ اس کی آگ میں جل رہے ہیں، آپ کے ملک کو آزاد ہوئے زیادہ عرصہ نہیں ہوا ہے، اور مسلمانوں سے متعلق سیاہ فام اکثریت کے دل میں ایک نرم گوشہ ابھی بھی موجود ہے، ہمیں اس سے فائدہ اُٹھانا چاہئے اور یہاں نفرت پھیلانے والی جو جماعتیں وجود میں آچکی ہیں، ان کے طاقتور ہونے سے پہلے ہی فرقہ پرستی کی آگ کو بجھادینا چاہئے، مفتی طاہر صاحب نے بھی ابنائے وطن کے ساتھ خوش اخلاقی اور تعلق مع اللہ کی طرف توجہ دلائی، سوالات سے اندازہ ہوا کہ جن امور پر توجہ دلائی گئی، حاضرین نے ان کی اہمیت محسوس کی، موضوع سے متعلق بہت سے شرعی مسائل خاص کر کرسمس وغیرہ کی تقریبات میں شرکت اور مبارکباد کے بارے میں دریافت کئے گئے اور ہندوستان کے موجودہ حالات پر بھی گفتگو ہوئی۔
۶؍دسمبر کو جوہانسبرگ کے پڑوس میں واقع ایک اور شہر لائنیشیا میں حدیث سیمینار منعقد ہوا، اس میں متعدد مقامی علماء نے بھی مقالہ یا محاضرہ پیش کیا، مولانا سلمان بجنوری، مفتی محمد طاہر غازی آبادی اور راقم الحروف کے بھی حدیث سے متعلق مختلف پہلوؤں پر مقالات پیش ہوئے؛ البتہ سوالات اور مذاکرہ کی نوبت نہیں آئی، اس سیمینار کی آخری نشست عشاء کے بعد منعقد ہوئی، جو درس بخاری شریف کی تکمیل کے لئے تھی، میں نے اس موقعہ پر دو باتوں کی طرف خصوصیت سے توجہ دلائی، ایک یہ کہ امام بخاریؒ نے اپنی کتاب کے اِس آخری باب میں ان لوگوں پر نقد کیا ہے، جو غیبی حقائق اور ما بعد الطبیعی عقائد کو سمجھنے کے لئے بھی عقل کو اساس وبنیاد تصور کرتے ہیں، اور جو بات عقل میں نہ آئے، اس کو قابل رد تصور کرتے ہیں، یہ فتنہ امام بخاریؒ کے دور میں بھی تھا، جو فلسفۂ یونان سے متأثر ہونے کی وجہ سے پیدا ہوا تھا، اور یہ فتنہ آج بھی موجود ہے، جو مغرب کے مادی تصور کی وجہ سے پیدا ہوا ہے؛ اس لئے یہ بات سمجھنے کی ضرورت ہے کہ کسی چیز کا عقل کے خلاف ہونا الگ بات ہے اور عقل سے ماوراء ہونا الگ بات ، اگر کوئی بات اس کائنات کے خالق نے کہی ہو اور ہماری سمجھ میں نہیں آئی تو یہ نہ سمجھنا چاہئے کہ یہ بات عقل کے خلاف ہے؛ بلکہ سمجھنا چاہئے کہ یہ ہماری عقل سے ماوراء ہے، دوسری بات یہ ہے کہ بخاری شریف کے بارے میں آج کل لوگ افراط وتفریط میں مبتلا ہیں، ایک تجدد پسند طبقہ وہ ہے جو بخاری کی روایات کو بے اعتبار کرنے کی کوشش میں لگا ہوا ہے، یہ دراصل اہل یورپ کی حدیث جیسے اہم ماخذ کے خلاف کئے جانے والے اعتراضات کو تقویت پہنچانے کی ناروا کوشش ہے، دوسری طرف وہ گروہ ہے جو یہ سمجھتا ہے کہ اگر کوئی مضمون بخاری کی حدیث میں آگیا تو اسے بہر حال دوسری کتابوں کی احادیث پر ترجیح ہوگی، اس کی وجہ سے وہ دوسرے فقہاء پر زبان درازی کرتے ہیں اور امت میں انتشار کا باعث بنتے ہیں؛ حالاں کہ ترجیح کی صرف یہی ایک بنیاد نہیں ہے کہ کوئی حدیث بخاری میں نقل کی گئی ہو؛ بلکہ ترجیح کے ایک سو ساٹھ سے زیادہ اسباب بیان کئے گئے ہیں، ان میں ایک سبب بخاری کی حدیث کا راجح ہونا ہے؛ لیکن اس سبب ترجیح کا نمبر بہت بعد میں رکھا گیا ہے؛ اس لئے افراط وتفریط دونوں سے بچنا چاہئے، ایسا ہو سکتا ہے کہ کوئی حدیث بخاری میں نہ ہوکسی اور کتاب میں ہو؛ لیکن اس کو بخاری کی حدیث پر ترجیح حاصل ہو۔
جنوبی افریقہ میں ہماری دوسری منزل وہاں کا مشہور ساحلی شہر’’ ڈربن‘‘  تھا، جہاں مولانا مفتی محمد زبیر بیات کی دعوت پر جانا ہوا؛ بلکہ وہ خود ہمیں لینے جوہانسبرگ آگئے ، ڈربن میں’’ دارالاحسان‘‘ کے نام سے ان کا ایک دعوتی اور تربیتی ادارہ ہے، میں ایک بار پہلے بھی اس ادارہ میں حاضر ہو چکا ہوں؛ لیکن جب اِس بار حاضر ہوا تو بڑی خوشگوار تبدیلیاں دیکھیں، وسیع زمین، خوبصورت محل وقوع، کشادہ اور جاذبِ نظر عمارت، مختلف شعبوں کے لئے الگ الگ دفاتر، دارالاحسان کے تحت دو پروگرام ہوئے، ایک: علماء کے لئے، دوسرے: تاجروں کے لئے، علماء کے پروگرام میں راقم الحروف نے خاص کر غیر مسلموں میں دعوتِ اسلام کے کام کی طرف توجہ دلائی، ماشاء اللہ حاضرین کی بڑی تعداد تھی، توجہ سے اس حقیر کی گزارشات سنی گئیں،پھر سوالات بھی کئے گئے ، تاجروں کی مجلس میں ان کی ضرورت کے مطابق گفتگو کی گئی، غریب ہم وطنوں کے ساتھ مواسات وغمخواری کی اہمیت پر روشنی ڈالی گئی، کچھ گفتگو میزبان کی خواہش پر اسلام کے اصول سرمایہ کاری پر بھی ہوئی، خاص کر ہوم فائنانس اور وہیکل فائنانس کے اسلامی طریقہ کار پر، اور اخیر میں سوالات کے جوابات دیے گئے۔
جنوبی افریقہ کے سفر سے محبت کی جو سوغات اپنے ہم وطن مسلمانوں کے لئے لا سکا، ان میں تین باتیں بڑی اہمیت کی حامل ہیں، ایک یہ کہ اخلاق سوز ماحول میں بھی اپنی اور اپنی نسلوں کی شناخت کو بچانا اور تردامنی سے بچتے ہوئے دریائے شور کو پار کرناجذبۂ ایمانی کا تقاضا ہے؛ کیوں کہ جو مغربی تہذیب اب ہمارے یہاں دستک دے رہی ہے اور سبک خرامی کے ساتھ اپنے قدم بڑھا رہی ہے، وہ وہاں زندگی کے ہر شعبہ میں عروج پر ہے، افریقہ کے وہ ممالک جن کو یورپ نے غلام بنایا، پھر انہیں آزادی دی؛ لیکن ذہنی غلامی کا طوق ان کے گلے میں ڈال دیا، ان میں یہ خطہ بھی ہے، وہاں یوروپ کی تمام سہولتیں بھی ہیں اور وہاں کی خرافات بھی، پھر بھی مسلمانوں نے بڑی حد تک اپنے معاشرہ کو بچایا ہے، مسلمانِ ہند کا بھی فریضہ ہے کہ وہ بھی اپنی نسل کی ایسی تربیت کریںکہ وہ حالات کے بگاڑ کا مقابلہ کر سکیں، اور اپنے وجود کو گم نہ ہونے دیں، دوسری چیز جو اس ملک کے مسلمانوں سے لینے کی ہے، وہ خدمت خلق کا جذبہ ہے، اور یہی خدمت خلق زینہ ہے تبلیغِ اسلام کا، جمعیۃ علماء تو اس میدان میں پہلے سے کام کر رہی ہے، اور اس کی خدمات بہت وسیع ہیں؛ لیکن ڈربن کے علاقہ میں خدمت اور دعوت کے کام میں دارالاحسان کی پیش رفت بھی بہت ہی قابل تحسین ہے اور روشن مستقبل کی شہادت دیتی ہے، افسوس کہ ہندوستان میں جب حالات اس کام کے لئے سازگار تھے تو اس پر توجہ نہیں دی گئی؛ لیکن اب بھی اس کے مواقع ختم نہیں ہوئے کہ اگر صبح کا بھولا شام کو آئے تو سمجھا جاتا ہے کہ اس نے منزل کو پالیا۔
جو ہانسبرگ میں ایک دن ہم لوگوں کو ایک پرائیویٹ زو میں لے جایا گیا، یہ ایک مسلمان تاجر کا ہے، کافی وسیع علاقہ ہے، یہاں شیر، چیتے، زراف، بھیڑیں، جنگلی کتوں وغیرہ کی بڑی تعداد ہے اور کھلی ہوئی حالت میں ہیں؛ لیکن ہر جانور کے لئے وائر کی فینسنگ کا احاطہ ہے، انسان بالکل قریب سے فطری حالت میں ان جانوروں کو دیکھتا ہے، ہم لوگ اس وقت لے جائے گئے جو شیروں کے لئے کھانے کی سپلائی کا وقت ہے، معلوم ہوا کہ دو دن پر ان کو کھانا دیا جاتا ہے، کھانے کے طور پر ان کو ۲۰؍ کیلو گوشت فی جانور فراہم کیا جاتا ہے، پھر دو دنوں کے بعد غذا دی جاتی ہے، اس مدت میں وہ اس غذا کو ہضم کرتے ہیں، اور کھانے کے بعد وہ کافی چلتے ہیں، ایک عجیب بات یہ دیکھنے میں آئی کہ شیر کتوں کی طرح کھانے کے لئے لڑتے نہیں ہیں، یہاں بیس کیلو کا گوشت کا ٹکڑا شیروں کی تعداد کے لحاظ سے پھینک دیا جاتا ہے، ہر شیر اپنا حصہ اُٹھا لیتا ہے، یا تو اسی وقت کھا لیتا ہے یا جہاں پر رہتا ہے، وہاں اس کو رکھ دیتا ہے، باپ کی شفقت ، ماں کی ممتا اورمادہ کی رعایت کا نظام ان کے یہاں بھی موجود ہے، نر شیر مادہ کے حصہ کا گوشت اُٹھا کر اس کے سامنے لا کر رکھتا ہے؛ بلکہ بعض دفعہ کھلاتا بھی ہے، اور بچوں کو گوشت کے ٹکڑے کر کے اور ہڈیوں کو گوشت سے الگ کر کے دیتا ہے، اور معلوم ہوا کہ مادہ کے پیٹ میں جب کسی نر کا بچہ پلتا رہتا ہے تو وہ اس درمیان کسی اور نر سے جسمانی تعلق قائم نہیں کرتی، یہ بات وہاں کی گائیڈ نے بتائی، یہ منظر دیکھ کر دل میں خیال آیا کہ جو مرد خاندان کا ذمہ دار ہو، اس کا افراد خاندان کے لئے جدوجہد کرنا ،ضروریات زندگی کو پورا کرنا اور ایک عورت کی وفاداری کا اپنے شوہر کے ساتھ مخصوص ہونا یہ ایسا خوبصورت اور فطری نظام ہے کہ اللہ تعالیٰ نے بعض جانوروں میں بھی ودیعت فرمایا ہے اور یہ اس طرز زندگی کے قانون فطرت ہونے کی دلیل ہے؛ کیوں کہ جانور نہ کسی تعلیم گاہ میں پڑھتے ہیں اور نہ کسی مفکر کا وعظ سنتے ہیں، یہ فطرت کی آواز ہے جو خالق کائنات نے ان کے اندر رکھی ہے۔

—————————————دوسری قسط

مؤرخہ۱۳؍دسمبر ۱۹ء کو ہم لوگ سفر کے اگلے مرحلہ پر روانہ ہوئے اور بحرِ ہند کے ایک چھوٹے سے جزیرہ ری یونین پہنچے، جو نقشہ میں ایسا نظر آتا ہے جیسے سمندر کے رخسار پر ایک خوبصورت سا تِل ، قدرتی خوبصورتی کے مظاہر پہاڑ، جنگل اور سمندر ہوتے ہیں اور یہ تینوں چیزیں یہاں جمع ہیں؛ اس لئے جس کو فطرت کا کچھ شعور ہو، وہ یہاں کی رعنائی میں کھو جاتا ہے، مجھے متعدد بار اس جزیرہ میں جانے کا موقع ملا، اور اس تأثر میں کوئی فرق نہیں آیا، شاید فطری نظاروں کے اعتبار سے یہ دنیا کا خوبصورت ترین علاقہ ہے، اس جزیرے کی ایک بلند اور سرسبز وشاداب پہاڑی پر دارالعلوم اشرفیہ قائم ہے، جہاں دورۂ حدیث تک تعلیم ہوتی ہے، یہ چوں کہ فرانس کی کالونی ہے؛ اس لئے فرنچ ہی سرکاری اور عوامی زبان ہے، دارالعلوم میں بھی زیادہ تر فرنچ زبان ہی میں تعلیم ہوتی ہے۔
     مجھ کو اور میرے ساتھ عزیزی مولوی محمد عمر عابدین قاسمی مدنی سلمہ کو یہاں ختم بخاری کے لئے مدعو کیا گیا تھا، اس ادارہ کے بانی وناظم جواں عمر فاضل مولانا محمد زکریا گنگات ہیں، ما شاء اللہ اس ادارہ کو متعدد مخلص اور باصلاحیت اساتذہ کی خدمات حاصل ہیں، جن میں مولانا انس لالہ، مولانا محمد عثمان، مولانا محمد یوسف اور مولانا امداداللہ وغیرہ خاص طور پر قابل ذکر ہیں، انتظامیہ، اساتذہ اور طلبہ کے درمیان مثالی ہم آہنگی ہے؛ اسی لئے اس ادارہ نے کم وقت میں ظاہری اور معنوی دونوں حیثیتوں سے نمایاں ترقی کی ہے، ادارہ کے ذمہ داران باشعور اور وسیع الفکر ہیں، جس کا اندازہ ان کی علمی اور دعوتی سرگرمیوں سے بھی لگایا جا سکتا ہے، مولانا زکریا گنگات صاحب نے متعدد پروگرام رکھے، بنیادی پروگرام تو ختم بخاری شریف کا تھا، جو میرے ذمہ تھا، اور مولوی عمر عابدین سلمہ نے علماء کی ذمہ داریوں پر خطاب کیا جو بہت پسند کیا گیا، یہ مرکزی پروگرام ۱۵؍دسمبر کو دارالعلوم کے احاطہ میں ہوا، جس میں وہاں کے لحاظ سے بڑی تعداد میں عوام وخواص نے شرکت کی، اس سے ایک دن پہلے ۱۴؍ دسمبر کو ایک ہوٹل میں مساجد کے نمائندوں کے ساتھ کھانے پر اس حقیر کی ملاقات رکھی گئی، مسلم سماج میں مساجد کی کیا اہمیت ہے، منتظمین مساجد کی کیا ذمہ داریاں ہیں اور مساجد کے ذریعہ کیا کام کئے جا سکتے ہیں؟ اس پر اس حقیر نے اختصار کے ساتھ گفتگو کی اور لوگوں کے سوالات کے جواب دیے، ۱۶؍ دسمبر کو صبح میں ہیلی کاپٹر کے ذریعہ جزیرہ کی سیر کا پروگرام رکھا گیا، یہ بڑا خوبصورت تفریحی پروگرام تھا، پائلٹ نے ہیلی کاپٹر کو پہاڑ کی چوٹیوں کے اتنے قریب سے گزارا کہ لگتا تھا کہ کہیں ہیلی کاپٹر ٹکرا نہ جائے، پہاڑوں کے درمیان جو تنگ اور گہرے درے ہیں، کیپٹن نے بڑی مہارت کے ساتھ ان کے درمیان سے بھی ہمیں گزارا، ایک گھنٹہ تک ہم لوگ اس خوبصورت جزیرہ کو فضا سے دیکھتے رہے؛ چوں کہ اس جزیرہ کے سارے پہاڑ درختوں اور سر سبز پودوں سے ڈھکے ہوئے ہیں؛ اس لئے بے حد خوبصورت نظر آتے ہیں، بہر حال ایسے مناظر دیکھ کر خالق کائنات کی قدرت پر انسان کا ایمان بڑھ جاتا ہے۔
     آج ہی مغرب کے بعد سینٹ لوئس کی وسیع اور خوبصورت مسجد میں عوامی پروگرام تھا، جس میں اس حقیر کے علاوہ مولوی محمد عمر عابدین سلمہ نے خطاب کیا، اور اخیر میں لوگوں کے سوالات کے جواب دیے گئے، ۱۷؍دسمبر کو سینٹ دینس کی ایک مسجد میں علماء اور عالمات کے لئے سیمینار رکھا گیا، جس کا عنوان تھا ’’ نئے مسائل اور ان کا حل‘‘ اس حقیر نے پاور پوائنٹ کے ذریعہ اس موضوع پر خطاب کیا اور راقم الحروف سے پہلے مولوی محمد عمر عابدین سلمہ نے عربی زبان میں دنیا بھر کی اہم فقہ اکیڈمیوں کا تعارف کرایا اور ان کی اہم تجاویز کی طرف اشارہ کیا، آج ہی بعد مغرب اس شہر کے ایک ہال میں ایک تربیتی پروگرام مردوں اور عورتوں کے لئے رکھا گیا، جس سے مولانا محمد عمر عابدین سلمہ نے خطاب کیا، لوگ ان کے خطاب سے بہت متأثر ہوئے۔
    ۱۸؍دسمبر کو بعد مغرب لڑکیوں کی ایک درسگاہ مدرسہ ہدایت النساء میں پروگرام رکھا گیا، جس میں ہم دونوں کی خواتین سے متعلق مسائل پر گفتگو تھی، یوروپ کے ملکوں میں فرانس ایک ایسا ملک ہے جہاں سب سے زیادہ شخصی آزادی کا غلغلہ بلند ہے، اس کا اثر نہ صرف مسلم خواتین پر ہے؛ بلکہ دینی تعلیم حاصل کرنے والی طالبات و عالمات پر بھی ہے، اس پس منظر میں راقم الحروف نے خواتین سے متعلق مغربی تصور اور عورتوں کے لئے اس کے نقصانات اور اسلام کا خاندانی زندگی میں تقسیم کار کا نظام اور اس نظام میں عورت کے لئے فوائد، سہولتوں اور رعایتوں پر روشنی ڈالی، پھر اخیر میں سوالات کے جواب دیے گئے، یہ پروگرام مدرسہ ہدایت النساء کے کانفرنس ہال میں رکھا گیا تھا، بیرونی حصہ میں مردوں کی نشستیں، اور اندرونی ہال میں خواتین کی، جس میں پروجیکٹر کے ذریعہ تقریر نشر کی جا رہی تھی۔
    ہندوستان کے مسلمانوں کے لئے یہاں کی جو بات قابلِ تقلید نظر آئی، وہ یہ ہے کہ یہاں جو مسلمان آباد ہیں، زیادہ تر ان کے آباء واجداد ہندوستان کے صوبۂ گجرات سے آئے تھے، اس کے علاوہ قریب کے دوسرے جزائر سے سیاہ فام مسلمان بھی یہاں آکر آباد ہوئے، اور کچھ مقامی لوگوں نے بھی اسلام قبول کیا، یہ سبھی حضرات فرنچ بولتے ہین، مسجدوں میں فرنچ زبانوں میں ہی بیانات ہوتے ہیں، اس کا نتیجہ ہے کہ وہاں اچھی فرنچ بولنے اور لکھنے والے مسلمانوں کی کافی تعداد ہے، علماء کے طبقہ میں بھی فرنچ زبان کے اچھے مقرر ہیں، جن کا خطاب غیر مسلم حضرات بھی پسند کرتے ہیں، اور خود مسلمانوں کی پڑھی لکھی نوجوان نسل بھی متأثر ہوتی ہے۔
    مولانا محمد انس لالہ جو جامعہ اشرف العلوم میں شیخ الحدیث ہیں، فرنچ زبان میں ان کی ویب سائٹ بہت مقبول ہے، اور مسلم وغیر مسلم دونوں طبقہ کے لوگ بکثرت اس سے استفادہ کرتے ہیں، یہ ہندوستان کے مسلمانوں اور علماء برادری کے لئے قابل تقلید ہے، ہندوستان ایسا ملک ہے، جہاں ایک درجن سے زیادہ زبانیں بولی جاتی ہیں، یہ مختلف علاقوں کی زبانیں ہیں، اور ہر علاقہ میں کئی پشتوں سے مسلمان آباد ہیں، اور غیر مسلم بھائیوں سے زندگی کے مختلف مراحل میں ان کا تعلق ہے؛ لیکن چند زبانیں جیسے: ملیالم، تمل، بنگلہ، گجراتی کو چھوڑ کر مقامی زبان میں اچھی تقریر کرنے والے مقررین اور معیاری زبان لکھنے والے مصنفین اور صحافی نہ ہونے کے برابر ہیں، اور بالخصوص علماء تو اس میں بہت پیچھے ہیں، حد یہ ہے کہ ہندی ملک کی قومی زبان ہے، اور اترپردیش، بہار، جھارکھنڈ، مدھیہ پردیش، راجستھان اور چھتیس گڑھ جیسی کثیر آبادی والی ریاستوں میں بولی جاتی ہے؛ لیکن ہندی میں اچھے مسلمان مصنف اورمقبول مقرر بہت کم ملتے ہیں، اور علماء کا رویہ تو کچھ ایسا ہے کہ گویا اس زبان کو تقریروتحریر کا ذریعہ بنانا کوئی گناہ کی بات ہو۔
    مقامی زبانوں کے ساتھ اس رویہ نے ہمیں بڑا نقصان پہنچایا ہے، اگر آپ مقامی زبان سے واقف ہیں اور اس میں بولنا اور لکھنا جانتے ہیں تو اس سے برادران وطن میں اُنس پیدا ہوتا ہے؛ کیوں کہ ہَم زبانی کا تعلق بھی اُنس کا ایک ذریعہ ہے، اس کے ذریعہ برادران وطن کے درمیان اسلام کا تعارف کرایا جا سکتا ہے، مقامی میڈیا میں اسلام کے خلاف جو باتیں کی جاتی ہیں، ان کا بہتر اور مؤثر جواب دیا جا سکتا ہے، سرکاری اسکیموں کو سمجھا اور سمجھایا جا سکتا ہے، اور بچوں کو ان کی تعلیم میں مدد مل سکتی ہے، شاید فرانس کے مسلمانوں کو فرنچ زبان کے پوری طرح اختیار کر لینے کا ثمرہ ہے کہ یورپ کے ملکوں میں سب سے زیادہ مسلمان اسی ریاست میں ہیں، اور اسلام قبول کرنے والے مردوخواتین کی تعداد بمقابلہ دوسرے مغربی ملکوں کے یہاں زیادہ ہے۔
     ۱۹؍ دسمبر کو افریقہ کا یہ خوشگوار سفر اپنے اختتام کو پہنچا، اور ہمارا یہ مختصر قافلہ دبئی پہنچا، اس پورے سفر میں مولوی عمر عابدین سلمہ کی رفاقت نے بڑی سہولت پہنچائی، جسمانی آرام بھی اور معنوی آرام بھی کہ جہاں میری طبیعت مضمحل ہوتی میں مختصر گفتگو کرتا اور وہ اس کی تلافی کرتے، اور چوں کہ وہ انگریزی میں بھی اچھی طرح گفتگو کر لیتے ہیں، اس سے بھی آسانی ہوئی، وہ تو دبئی ائیر پورٹ ہی سے حیدرآباد کے لئے روانہ ہوگئے؛ لیکن میں نے دبئی میں اپنے چھوٹے لڑکے عزیزی ظفرعابدین ندوی سلمہ (شرعی ایڈوائزر دبئی اسلامک بینک) کے یہاں تین چار دنوں قیام کیا، انسان کو اپنی اولاد کی طرح اولاد کی اولاد کو دیکھ کر بھی ایک خوشی ہوتی ہے، وہ خوشی یہاں حاصل رہی، میں نے منع کر دیا تھا کہ یہاں کوئی پروگرام نہ رکھا جائے، میں صرف اپنے بچوں کے ساتھ وقت گذاروں گا، انھوں نے بڑی حد تک اس پر عمل کیا؛ لیکن مولانا عبدالمتین ندوی بھٹکلی نے آخر پکڑ ہی لیا، اور ایک بھٹکلی دوست کے یہاں نشست رکھی گئی، مقامی حالات کے تحت قصداََ کم لوگوں کو دعوت دی گئی، جب آدمی اپنے وطن سے باہر ہوتا ہے تو اسے اپنے وطن کی ایک ایک بات عزیز ہوتی ہے؛ اس لئے حاضرین کا تقاضا ہوا کہ ہندوستان کے موجودہ حالات اور مسلمانوں کے لائحۂ عمل پر کچھ عرض کیا جائے؛ چنانچہ گفتگو کی گئی اور خاص طور پر یہ بات کہی گئی کہ ہمیں ہرگز مایوس نہیں ہونا چاہئے، ہندوستان کا دستور نہایت مستحکم بنیادوں پر مرتب کیا گیا ہے، اور آج بھی اس ملک کی غالب اکثریت سیکولر مزاج اور انصاف پسند ہے۔
     میں نے ان سے گزارش کی کہ ہندوستان میںمقیم لوگوں کے مقابلہ آپ کے معاشی حالات بہتر ہیں، آپ اس کو صرف خوبصورت مکانات کی تعمیر اور تزک واحتشام کے ساتھ منعقد کی جانے والی تقریبات میں خرچ کرنے کے بجائے اپنے بچوں کو ایسی تعلیم دلائیں کہ خود ان کو بھی فائدہ ہو اور وہ امت کے لئے بھی اثاثہ بنیں، ان کو سول سروسیز کے امتحانات کے لئے تیار کرائیں، ان کو صرف ڈاکٹر نہ بنائیے، میڈیکل سائنٹسٹ بنائیے، ان کو صرف کسی شعبہ کا انجینئر نہ بنائیے؛ بلکہ ان کو اس لائق بنائیے کہ وہ ایجادات واختراعات کی دنیا کو کچھ دے سکیں، ان کو لاء کی تعلیم دلائیے، اور موقع دیجئے کہ وہ بہترین قانون داں بنیں، اچھے بیرسٹر بن سکیں، اور اس ملک میں پوری قوت کے ساتھ سپریم کورٹ تک ملت کے مقدمات کی پیروی کریں، یہ آپ کی جانب سے ہندوستان کی ملت مسلمہ کے لئے بہترین تحفہ ہوگا۔
    دبئی ہی میں میرے ایک قدیم وعزیز شاگرد مولانا ڈاکٹر عبدالعزیز قادری آکر ملے، وہ ما شاء اللہ بہت اچھی خدمت کر رہے ہیں اور جمعہ کے دن انگریزی زبان میں ان کا خطاب ہوتا ہے، انھوں نے کہا کہ وہ معہد سے فاصلاتی طور پر افتاء کرنا چاہتے ہیں؛چنانچہ ان کے سامنے اصول افتاء سے متعلق تفصیلی محاضرہ دیا گیا، اور مشق فتاویٰ کے لئے پچیس تیس سوالات لکھائے گئے، اس واقعہ کو ذکر کرنے کا مقصد یہ ہے کہ جس شخص میں علم کی طلب ہوتی ہے، اس کی پیاس بجھائے نہیں بجھتی، اور وہ عمر کی قید سے آزاد ہوتی ہے، اگر ہر تعلیم یافتہ مسلمان اپنی اپنی لائن میں اس پیاس کو پیدا کر لے تو یہ قوم علم کے جواہر پاروں سے مالا مال ہو جائے۔

٭    ٭    ٭